Kryetari i Komunës së Bujanocit, Arbër Pajaziti, ka pritur sot në një takim sekretarin e parë pranë Ambasadës së Mbretërisë së Bashkuar në Beograd, z. William Hopkinson, i ngarkuar për çështje politike.
Në këtë takim, Pajaziti e informoi diplomatin britanik mbi zhvillimet politike dhe të sigurisë në komunë dhe në mbarë Luginën e Preshevës. Ai theksoi problematikat me të cilat përballet popullata shqiptare, si pasivizimi i adresave, mosnjohja e diplomave dhe ngecjet në proceset e integrimit.
Një pikë e veçantë e bisedës ishte dokumenti me 10 kërkesa që Pajaziti ua ka dorëzuar zyrtarëve qeveritarë serbë. “Realizimi i këtyre kërkesave është prioritet i padiskutueshëm për ne si përfaqësues shqiptarë,” theksoi ai, duke kërkuar mbështetjen e Mbretërisë së Bashkuar në këtë drejtim.
Pajaziti dhe Hopkinson diskutuan gjithashtu për projektet që Britania e Madhe mbështet në Bujanoc, veçanërisht në fushën e zhvillimit të të rinjve. Diplomati britanik e siguroi se Mbretëria e Bashkuar do të vazhdojë të jetë e përkushtuar në Luginë, duke qëndruar pranë qytetarëve të saj në sfidat dhe zhvillimet që vijnë.
Lidhur me mbishkrimet në sheshin e qytetit në Bujanoc, kanë reaguar disa nga përfaqësuesit politikë shqiptarë, si deputeti Shaip Kamberi, kryetari i Komunës së Bujanocit Arbër Pajaziti, kryetari i Këshillit kombëtar Shqiptar, Enkel Rexhepi dhe kryetari i Partisë Demokratike Nagip Arifi.
Postimi i deputeti Shaip Kamberi:
Glorifikimi i kriminelëve të luftës nga Qeveria në Beograd po i shndërron kriminelët e dënuar për krime lufte në emra që po vizatohen e shkruhen gjithandej në Serbi.
Për fat të keq, mbrëmjen e kaluar, edhe sheshi i Bujanocit nuk i shpëtoi këtij fenomeni, ku emri i Ratko Mladiçit u shkrua nga persona të paidentifikuar.
Kjo nuk është vetëm një fyerje për viktimat e luftës, por edhe një përpjekje e rrezikshme për të imponuar krimin si vlerë dhe për ta normalizuar të keqen.
Çdo glorifikim i krimit është një akt kundër paqes, kundër drejtësisë dhe kundër së ardhmes së shoqërisë.
Reagimi i kryetarit të komunës së Bujanocit Arbër Pajaziti:
Dënojmë mbishkrimet në qendër të qytetit me emrin e të dënuarit për krime lufte nga Tribunali i Hagës, Ratko Mlladiq.
Kërkojmë nga organet kompetente të zbardhin rastin dhe të evitojnë çdo përsëritje të këtyre dukurive që nuk janë në interes të qytetarëve tanë.
Është e papranueshme që organet kompetente deri më tash nuk kanë zbardhur asnjë rast i cili mund të çoj në tensione ndëretnike.
Bujanoci gjithmonë ka qenë model i bashkekzistencës midis popujve dhe si i tillë duhet të mbetet.
Reagimi i Kryetarit të KKSh Enkel Rexhepi:
𝐊𝐫𝐢𝐦𝐢 𝐧𝐮𝐤 𝐝𝐨 𝐭𝐞̈ 𝐛𝐞̈𝐡𝐞𝐭 𝐤𝐮𝐫𝐫𝐞̈ 𝐥𝐚𝐯𝐝𝐢!❌
Të shkruash emrin e një krimineli lufte në zemër të Bujanocit është provokim i ulët dhe fyerje për të gjithë shqiptarët.
Këto mbishkrime nuk janë vetëm ngjyrë në mure, por janë plagë të hapura për familjet e viktimave, për popujt që kanë vuajtur nga gjenocidi i këtyre kriminelëve.
Ky mbishkrim ka pas vetes një strukturë të organizuar kriminale…
Reagimi i ish-kryetarit të komunës, njëherit kryetar i Partisë Demokratike, Nagip Arifi
Grafitet me emrin e kriminelit Ratko Mladiq në sheshin e qytetit në Bujanoc janë kërcënim i hapur për bashkëjetesën në komunë, si dhe fyerje e rëndë për viktimat e gjenocidit. Heshtja institucionale ndaj mesazheve të shpeshta të urrejtjes në komunën e Bujanocit është bashkëfajësi.
Kërkoj nga organet shtetërore që të identifikohen dhe ndëshkohen sa më parë autorët dhe të ndërmerren masa paranduluese, kurse nga organet komunale, të fshihen menjëherë këto grafite.
Bujanoci nuk është vendi për glorifikim të kriminelëve të luftës.
Shokët dhe shoqet e klasës e të gjeneratës së Arbenit Mujës, së bashku me familjen e tij, kanë marrë nismën për të organizuar një marsh përkujtimor nesër, të premten më 7 shtator 2025, në qendër të Bujanocit. Marshi, që nis në orën 14:00, do të mbahet nën moton “Çu kundër dhunës”, si një zë i fuqishëm kundër tragjedive të panevojshme dhe një thirrje për drejtësi.
Arbenit Muja humbi jetën tragjikisht natën e 6 gushtit 2025, pas një konflikti fizik. Humbja e tij, vetëm 19 vjeç, tronditi shokët, familjen dhe mbarë qytetin. Në thirrjen e shpërndarë nga gjenerata e tij dhe familja, theksohet: “Dhuna na vret të gjithëve. Humbja e Arbenitit nuk është vetëm e familjes së tij, por plagë për të gjithë ne. Nesër ngrihemi për të thënë mjaft – për një shoqëri pa dhunë, për paqe dhe drejtësi.”
Heshtja që rëndon mbi Bujanocin Që nga dita e tragjedisë e deri sot, përveç dhimbjes së familjes dhe zërit të shokëve të gjeneratës, mungesa e reagimit publik ka qenë tronditëse. Institucionet, shkolla, pushteti lokal dhe organizatat shoqërore nuk kanë reaguar, duke lënë një boshllëk të madh në momentin kur komuniteti kishte më shumë se kurrë nevojë për solidaritet.
Deri më tani, i vetmi që ka reaguar publikisht është gazetari lokal Agon Islami, i cili në një shkrim kritik të botuar ditë më parë e quajti këtë heshtje “bashkëfajësi morale dhe dështim kolektiv”, duke ngritur pyetje serioze mbi përgjegjësinë e institucioneve arsimore, policore e shoqërore që nuk vepruan në kohë.
Marshi i nesërm pritet të shndërrohet në një mesazh të fuqishëm kundër heshtjes dhe dhunës, për të kujtuar se jeta e humbur e Arbenit Mujës nuk është vetëm dhimbje e familjes së tij, por plagë e të gjithë komunitetit./LUGINALAJMI/
Sot, Albena Mustafa ka marrë zyrtarisht detyrën e drejtoreshës së Shtëpisë së Kulturës në Bujanoc, duke pasuar në këtë funksion Adem Hasanin.
Ky emërim përbën një hap pozitiv dhe inkurajues, pasi rrallëherë një grua ka udhëhequr këtë institucion të rëndësishëm kulturor. Kjo ngjarje dërgon një mesazh të qartë në favor të barazisë gjinore dhe përfshirjes së grave në pozita udhëheqëse në jetën publike dhe kulturore të komunës.
Albena Mustafa sjell me vete një përvojë të gjatë profesionale, duke punuar si edukatore për fëmijë për plot 29 vjet. Ajo gëzon respekt të gjerë në komunitet dhe njihet për përkushtimin në punë si dhe afërsinë me qytetarët.
Emërimi i saj pritet të sjellë një energji të re dhe një qasje të freskët në zhvillimin e jetës kulturore në Bujanoc.
24 Korriku në Roskovec” nuk është thjesht një datë në kalendar, por një festë që mbledh bashkë zemrat, këngën dhe mikpritjen e këtij qyteti të vogël, por me shpirt të madh. Si çdo vit, Roskoveci hap dyert për artin, muzikën dhe gëzimin, duke bërë që sheshi të kthehet në një skenë të gjallë, ku emrat më të njohur të muzikës shqiptare i dhurojnë publikut një natë plot emocion dhe kujtime të paharruara.
Kjo festë është një falënderim për qytetarët që punojnë me përkushtim çdo ditë dhe një mundësi për të festuar së bashku, me muzikë, valle e buzëqeshje. Për Roskovecin, 24 Korriku është dëshmi e traditës dhe dashurisë për artin, një mbrëmje që lartëson qytetin dhe i jep zë shpirtit të tij mikpritës. Roskoveci atë natë nuk është thjesht një vend, por një frymëmarrje e përbashkët, një kujtim i ngrohtë që do të jetojë gjatë, si një melodi që nuk shuhet as me agimin e ditës tjetër. 24 Korriku është festa e shpirtit, e bashkimit dhe e krenarisë për të qenë pjesë e kësaj toke që di të dojë dhe të
Në mbledhjen e 264-të të Qeverisë së Republikës së Kosovës, të mbajtur sot, është miratuar vendimi për mbështetjen financiare prej 580,000 euro për ndërtimin e objektit të përbashkët që do të shërbejë si Shkollë e Muzikës dhe Muze i Preshevës, një projekt me vlera të shumëfishta kombëtare, edukative dhe kulturore për shqiptarët në Luginën e Preshevës.
Ky vendim nuk është thjesht një investim infrastrukturor, por është një hap konkret drejt zgjerimit dhe themelimit të institucioneve shqiptare në Luginën e Preshevës, në veçanti në një rajon ku mungesa e hapësirave publike funksionale ka qenë pengesë reale për zhvillim kulturor dhe edukative.
Ndërtesa e përbashkët e Shkollës së Muzikës dhe Muzeut të Preshevës nuk është thjesht një objekt.
Është gurthemeli i institucionalizimit të kulturës dhe kujtesës kombëtare shqiptare në Luginë Shkolla e Muzikës do të jetë baza e parë për edukimin profesional muzikor të brezit të ri, duke nxitur talentin dhe krijimtarinë në një mjedis bashkëkohor.
Muzeu i Preshevës, si institucioni i parë i këtij lloji, do të krijojë më në fund mundësinë që historia, kultura dhe trashëgimia shqiptare në Luginë të kenë një adresë zyrtare dhe dinjitoze, siç e meritojnë.
Hartimin teknik dhe realizimin e këtij projekti do ta zbaton Komuna e Preshevës, në kuadër të planit të saj zhvillimor për ngritjen e infrastrukturës publike kulturore dhe arsimore. Kjo është dëshmi se kur institucionet lokale kanë vizion, ato mund të ndërtojnë modele funksionale edhe në kushte sfiduese.
Këshilli Kombëtar Shqiptar do të jetë garantues i transparencës, bashkëpunimit ndërinstitucional (Qeveri e Republikës së Kosovës dhe Komuna e Preshevës) dhe realizimit të qëllimit për të kthyer këtë objekt në një qendër të gjallë kulturore dhe arsimore për gjithë Luginën.
Falënderojmë Qeverinë e Republikës së Kosovës dhe Ministrinë e Kulturës për këtë mbështetje strategjike, që e shndërron kujdesin institucional në vepër konkrete dhe që e forcon pozitën e shqiptarëve në Luginë.
Ky nuk është vetëm një projekt, por është një mesazh. Se shqiptarët e Luginës nuk janë të harruar, dhe se kulturës sonë po i jepet vendi që meriton, ka shkruar kryetari i KKSH-së Enkel Rexhepi.
pas publikimit të rezultateve të projekteve mediale në komunën e Bujanocit ka reaguar kryetari i Këshillit Kombëtar Shqiptar Enkel Rexhepi i cili kërkon anulimij e konkursit i cili diskriminon mediat në gjuhën shqipe.
Gjatë ditës së sotme, kam dorëzuar kërkesë zyrtare për anulimin e konkursit për bashkëfinancimin e projekteve mediatike për vitin 2025, të shpallur nga Komuna e Bujanocit. Kjo kërkesë bazohet në shkeljen e dispozitave të nenit 21 dhe 25 të Ligjit për Këshillat Kombëtare, pasi në këtë proces nuk është kërkuar mendimi i KKSH-së, pavarësisht se projektet e propozuara për financim përfshijnë edhe prodhime në gjuhën shqipe. Për më tepër, përmes propozimit të bërë nga komisioni vlerësues, është evidentuar mungesa e qasjes së barabartë ndaj mediave që informojnë në shqip. Një pjesë e konsiderueshme e fondeve është propozuar të ndahet për media që nuk ushtrojnë veprimtari reale në territorin e Komunës së Bujanocit, përfshirë edhe media nga qyteti i Vranjës, ndërkohë që mediat lokale në gjuhën shqipe janë lënë anash. Kjo është e papranueshme në një komunë me shumicë shqiptare (rikujtim: mbi 62% të banorëve të Bujanocit janë shqiptarë) dhe përbën një shkelje të parimeve të barazisë, përfaqësimit dhe të drejtës për informim në gjuhën amtare.
Andaj, kërkojmë anulimin e këtij konkursi dhe vendosjen e një praktike të rregullt konsultimi institucional, ku KKSH përfshihet në çdo proces që lidhet me fushat ku ka kompetenca ligjore. Nëse kjo kërkesë dhe detyrimet ligjore nuk respektohen, KKSH do të ndërmarrë të gjitha hapat e nevojshëm institucionalë dhe ligjorë për të mbrojtur të drejtat dhe interesat e komunitetit shqiptar në Bujanoc.
Deputeti shqiptar në Parlamentin e Serbisë, Shaip Kamberi përmes një postimi në Facebook, ka shprehur pakënaqësinë për mosrealizimin e kërkesave lidhur me të drejtat e shqiptarëve në Serbi. Ai ka paralajmëruar edhe mundësinë e mos pjesëmarrjes në punimet e ardhshme të parlamentit.
postimi i plotë:
Duke pasur parasysh se komuniteti që përfaqësoj i qëndron besnik vetëm orientimit pro evropian të Ballkanit Perëndimor dhe beson fuqishëm në vlerat e demokracisë, të drejtave të njeriut dhe barazisë;
Duke u nisur nga fakti se respektimi i të drejtave të njeriut dhe të pakicave është themeli i çdo shoqërie të shëndoshë evropiane;
Duke marrë parasysh vendimin e opozitës pro evropiane për të bojkotuar punën e Parlamentit si reagim ndaj krizës së thellë politike dhe institucionale në vend;
Duke qenë dëshmitar çdo ditë i shkeljeve të vazhdueshme të të drejtave themelore të njeriut dhe të komuniteteve pakicë – në veçanti të shqiptarëve, të drejtat e të cilëve vazhdojnë të nëpërkëmben prej dekadash, përkundër tre marrëveshjeve të nënshkruara me Beogradin (2001, 2009 dhe 2013);
Mosnjohja e diplomave, nënpërfaqësimi politik dhe institucional, pasivizimi administrativ dhe mungesa e perspektivës ekonomike janë bërë pjesë e një agjende sistematike që synon shpopullimin e Luginës së Preshevës nga shqiptarët;
Duke vërejtur mungesën e plotë të vullnetit politik për të proceduar me nismat dhe iniciativat ligjore që do të përmirësonin pozitën e shqiptarëve në Serbi – të cilat tashmë prej muajsh mbeten të bllokuara në procedurat parlamentare;
Duke besuar se demokratizimi i Serbisë nuk është çështje e thjeshtë e ndërrimit të pushtetit, por kërkon vullnet të sinqertë për reformë, respekt për të gjithë qytetarët dhe trajtim të barabartë për të gjitha komunitetet; në fakt, demokratizimi i vërtetë mund të ndodhë vetëm kur, krahas ndërrimit të pushtetit, ndodh edhe shkëputja përfundimtare nga politika imperialiste e viteve ’90;
Në këto rrethana, nuk do të marr pjesë në punimet e ardhshme të Parlamentit të Serbisë.
Përfaqësuesit politikë shqiptarë ndër vite kanë ngritur zërin në Parlament duke folur në emër të të drejtave, barazisë dhe të ardhmes evropiane, duke kërkuar respektimin e normave themelore të të drejtave të njeriut dhe duke apeluar ndaj Bashkimit Evropian për zbatimin e marrëveshjeve të vitit 2001, 2009 dhe 2013 – fatkeqësisht pa sukses.
Shoqëria vërtet pro evropiane mund të ndërtohet vetëm duke garantuar kushte të barabarta dhe trajtim dinjitoz për të gjithë – përfshirë shqiptarët. Ajo nuk mund të ndërtohet mbi mitet e së kaluarës, as mbi trillimet historike dhe as mbi ambicien për hegjemonizëm në Ballkanin Perëndimor.
Për veprimet e ardhshme politike do të njoftoheni me kohë. Të gjitha do t’i koordinojmë me aleatët tanë politikë dhe me të gjithë ata që vërtet besojnë në vlerat properëndimore dhe demokratike.
Komuna e Bujanocit e ka pajisur Repartin e Gjinekologjisë në Shtëpinë e Shëndetit Bujanoc me aparatin CTG
Shtëpia e Shëndetit në Bujanoc është pajisur me aparatin CTG, një pajisje moderne dhe shumë e rëndësishme për monitorimin e shëndetit të foshnjeve dhe nënës gjatë shtatzënisë.
Ky investim bën të mundur që gratë shtatzëna nga Bujanoci dhe rrethina të mos kenë më nevojë të udhëtojnë në Vranjë apo në klinika private për këtë shërbim, duke kursyer kohë, para dhe duke rritur sigurinë gjatë shtatzënisë.
Ky është një hap i rëndësishëm në drejtim të përmirësimit të shërbimeve shëndetësore publike në komunën tonë, dhe mbështetja e grave dhe familjeve të reja mbetet një nga prioritetet tona.
Ftojmë qytetaret tona të përfitojnë nga ky shërbim i ri, i cili tashmë ofrohet në mënyrë të rregullt dhe falas në Shtëpinë e Shëndetit në Bujanoc.
Gjatë ditës së sotme patëm nderin të mirëpresim në selinë e Këshillit Kombëtar Shqiptar sekretarin nga Ambasada e Shteteve të Bashkuara në Beograd. Takimi ishte një mundësi e rëndësishme për të paraqitur sfidat dhe problemet me të cilat përballet komuniteti shqiptar në Luginë.
Diskutuam për moszbatimin e marrëveshjeve të arritura më parë, për vazhdimin e procesit të pasivizimit të adresave, për bllokimin e fondeve të bujqësisë nga Republika e Kosovës, si dhe për mungesën e një programi funksional të policisë multietnike në rajon. Po ashtu, u theksuan edhe shumë çështje të tjera që ndërlidhen me të drejtat themelore dhe përfaqësimin e barabartë të shqiptarëve.
Një shqetësim i veçantë që u ngrit gjatë takimit ishte edhe mosfillimi i renovimit të shkollës fillore “Sami Frashëri” në Lluçan, pavarësisht dakordimit të mëhershëm dhe informimit të drejtpërdrejtë të Ambasadës së SHBA-së dhe ish-Ambasadorit Hill për këtë çështje. Për dy vite me radhë, Qeveria e Serbisë ka ofruar vetëm arsyetime të ndryshme në vend të rezultateve konkrete. Ky është një shembull i qartë se si funksionon shpesh qeveria: merr obligime sa për sy e faqe, e më pas zvarritë në pafundësi zbatimin, duke treguar qartë mungesën e vullnetit për të ndërmarrë hapa të vërtetë drejt përmirësimit të pozitës së shqiptarëve në Luginë.
