Ambasadori amerikan në Kosovë Philip Kosnett ka deklaruar se SHBA-ja është e përkushtuar në ofrimin e mbështetjes së dialogut Kosovë-Serbi.

Kosnett në intervistën për “Radio Kontakt Plus”, ka thënë se durimi i SHBA-së ka gjithmonë kufij dhe se nuk mund të garantojë se Washingtoni edhe në të ardhmen do të jetë po kaq i përkushtuar nëse qeveritë e dy vendeve dëshirojnë të ecin përpara më shpejt, transmeton Koha.net.

“Durimi ynë ka gjithmonë kufij. Një gjë që ua kemi thënë dy qeverive, në Kosovë dhe në Serbi, është se SHBA-ja i përkushtohet ofrimit të përkrahjes në proces. Presidenti Trump, siç e dini, u ka shkruar letra presidentit Thaçi dhe presidentit Vuçiq se SHBA-ja është krejtësisht e përkushtuar ndaj këtij procesi”, ka thënë Kosnett, citon b92.

Ai ka tërhequr vërejtjen se nëse qeveritë e dy vendeve nuk duan të ecin përpara sa më shpejt dhe thonë “e po mirë, jemi të gatshëm brenda disa viteve”, atëherë nuk mund të garantohet se Washingtoni edhe në të ardhmen do të jetë po kaq i përkushtuar sa është dhe tani.

Duke folur për taksën e Kosovës vënë ndaj mallrave të Serbisë e të Bosnjë e Hercegovinës , ai ka thënë se Qeveria amerikane edhe më tej beson se heqja e taksës është një hap i rëndësishëm që dialogu ndërmjet Kosovës e Serbisë sërish të vazhdojë dhe kjo gjë është thënë tash e disa herë.

“Ajo që e kemi thënë, ajo që Qeveria ime e ka thënë, është se ne mendojmë se Kosova e Serbia në vitin 2019 duhet të arrijnë te marrëveshja gjithëpërfshirëse, duhet t’i shikojmë të dy palët të kthyera në tavolinën e bisedave dhe që dialogu të zhvillohet sa më shpejt që të jetë e mundshme. Nuk dua që procesin ta lidh me ndonjë datë qëllimisht të caktuar”, ka thënë Kosnett.

Ai ka vlerësuar se bisedimet për bashkimin e Mitrovicës jugore dhe asaj veriore aktualisht nuk janë as konstruktive dhe as produktive, ndërsa ka shtuar se e kupton shqetësimin e serbëve për paralajmërimet e bashkimit të Mitrovicës, për Trepçën dhe statusin e Universitetit të Prishtinës në Mitrovicën veriore.

Ambasadori i SHBA-së në Kosovë, Philip Kosnett, dje ka qëndruar në Mitrovicën veriore dhe atje është takuar me përfaqësues të Listës Serbe, të Policisë së Kosovës, EULEX-it, KFOR-it, OJQ-ve dhe me gazetarë.

Qeveria e Serbisë ka miratuar ditë më parë marrëveshjen për uljen e çmimit të shërbimeve të roamingut në rajonin e Ballkanit Perëndimor, ku është përfshirë edhe Kosova.

Kundër këtij vendimi ka qenë vetëm ministri përgjegjës për Inovacion dhe Zhvillim teknologjik, Nenad Popoviq.

Votimi, siç raporton e përditshmja serbe “Blic”, nuk ka shkuar pa shkëmbim të këndvështrimeve, ndërsa Popoviq ka thënë se në këtë moment nuk është i diskutueshëm nënshkrimi i kësaj marrëveshjeje, sepse autoritetet e Prishtinës kanë ngritur taksën ndaj mallrave serbe, gjë e cila ka sjellë deri tek bllokimi i dialogut Kosovë-Serbi, transmeton Koha.net.

Kryeministrja serbe, Ana Bërnabiq, siç thotë burimi i “Blicit”, ka thënë se kjo është çështje e rëndësishme politike dhe se për të do të diskutohet edhe më tutje.

Marrëveshja për uljen e çmimit të shërbimit të roamingut në rajonin e Ballkanit Perëndimor, që përfshin Bosnjë e Hercegovinën, Maqedoninë, Serbinë, Malin e Zi, Shqipërinë, por edhe Kosovën me fusnotë, forma politikisht korrekte e përfshirjes së Kosovës për Serbinë, do të duhej parafinuar më 4 prill në Beograd mes gjashtë ekonomive të Ballkanit Perëndimor.

Kryeministrja serbe dje deklaroi se Serbia mbetet e përkushtuar në integrimet evropiane dhe në stabilitetin e rajonit, por theksoi se nuk është fer insistimi në nënshkrimin e marrëveshjeve të reja kur, sipas saj, “Prishtina nuk respekton disa prej marrëveshjeve themelore rajonale”.

Në natën mes të shtunës dhe të dielës (30-31 mars) fillon llogaritja verore e kohës. Shumica e vendeve të Evropës do t’i zhvendosin akrepat përpara për një orë të dielën, më 31 mars 2019. Momenti zyrtar i ndryshimit të orës është pikërisht në orë 02:00, atëherë kur akrepat kalojnë 60 minuta para duke shënuar 03:00.

Në shtator të vitit 2018, Komisioni Evropian nxori një projekt-direktivë. Në një sondazh publik, më shumë se 80% e 4.6 milionë të anketuarve votuan për t’i dhënë fund ndryshimeve të orës sezonale, por Shtetet Anëtare të BE-së u bënë thirrje për më shumë kohë para se t’i jepin fund kësaj praktike.

Prej vitit 1981 u vendos ndryshimi i orës, që përfshin të gjithë Evropën, ku në shumë shtete të saj, akrepat e orës lëvizin 60 minuta përpara.

Norma evropiane përcakton në mënyrë të qëndrueshme datat e fillimit të periudhës së orës verore, ku akrepat lëvizin 60 minuta para dhe orës dimërore kur ata lëvizin 1 orë pas.

Parlamentarët evropianë kanë votuar për t’i dhënë fund ndryshimit të orës 2 herë në vit, por kjo do të finalizohet në prillin e vitit 2021, dy vite pas propozimit të parë të ligjvënësve evropianë.