Banorët në shtetin verior të Indisë Punjab këto ditë po e shohin  vargmalin e Himalajeve, i cili tani është më i dukshëm nga 160 kilometra për shkak të zvogëlimit të ndotjes së ajrit të shkaktuar nga bllokada si pasojë e koronavirusit në vend.

Indianët në qytetin e Jalandharit dhe zonën përreth kanë postuar fotografi në internet me pamje nga shtëpitë e tyre, me disa duke thënë se nuk kanë parë majat e Himalajeve për dekada.

“Për herë të parë në gati 30 vjet (Unë) mund të shoh qartë Himalajet për shkak se bllokada në Indi ka pastruar ajrin. Mahnitëse,” shkroi Manjit Kang një qytetar i kësaj zone.

Fenomeni është bërë i mundur nga një përmirësim dramatik në cilësinë e ajrit javët e fundit, pasi industritë u mbyllën, makinat u larguan nga rruga dhe linjat ajrore anuluan fluturimet në përgjigje të pandemisë së koronavirusit.

Delhi regjistroi një ulje prej 44% të niveleve të ndotjes së ajrit PM10 në ditën e parë të kufizimeve të tij, theksohet në të gjeturat e Bordit Qendror të Kontrollit të Ndotjes së Indisë.

Sipas raportit, në total 85 qytete në të gjithë Indinë panë më pak ndotje të ajrit në javën e parë të bllokimit mbarëkombëtar.

Ndërkohë, cilësia e ajrit në Jalandhar, e cila ndodhet më shumë se 160 kilometra larg  Himalajeve, është matur si “e mirë” në indeksin kombëtar të vendit për 16 nga 17 ditët që kur u njoftua bllokimi në shkallë vendi, raporton CNN, transmeton Klan Kosova.

Në të kundërtën, e njëjta periudhë 17 ditore vitin e kaluar nuk arriti të regjistrojë një ditë të vetme të cilësisë së “mirë” të ajrit – dhe në 17 ditët e para të marsit të këtij viti, vetëm tre ditë panë cilësi “të mirë” të ajrit.

India është shtëpia e 21-të nga 30 zonat urbane më të ndotura në botë, sipas të dhënave të përpiluara në Raportin e Cilësisë së Ajrit Botëror të IQAir AirVisual për vitin 2019, me gjashtë në top dhjetëshen.

Vendi ka raportuar gati 6,000 raste nga Covid-19, dhe 178 vdekje sipas shifrave të Universitetit Johns Hopkins, transmeton Klan Kosova.

Në fillim të muajit Arabia Saudite vendosi ndalimin tërëditor të lëvizjes në Mekë dhe në Medinë, në kuadër të masave për parandalimin e përhapjes së koronavirusit, raporton “Anadolu Agency” (AA).

Vendet e shenjta të muslimanëve, ku gjatë të gjitha periudhave të vitit janë të pranishëm një numër i madh besimtarësh, këto ditë janë plotësisht të boshatisura.

AA-ja ka arritur të bëjë foto të Mesxhidul-haramit, e njohur si Xhamia e Shenjtë ose Xhamia e Madhe në Mekë, e cila parqet qendrën e botës muslimane dhe vendi kah drejtohen muslimanët pesë herë në ditë kur falen.

Hapësira e Qabesë, që është vendtubimi i besimtarëve nga e gjithë bota, posaçërisht gjatë haxhit, një nga pesë shtyllat e islamit, është plotësisht e zbrazur. Përreth Qabesë mund të shihen vetëm personat që sigurojnë dhe mirëmbajnë këtë hapësirë.

Në foto, mund të shihet edhe hapësira e cila në kushte normale përdoret nga haxhinjtë gjatë kryerjes së sa’jës (ecja nga Safa deri në Merve), e cila gjithashtu është plotësisht e zbrazur.

Sipas vendimit të Ministrisë së Brendshme saudite, të 2 prillit, në Mekë dhe Medinë u shpall orë policore deri në njoftimin e mëtejshëm. Punonjësit në sektorin publik dhe privat, të cilat janë jetësore, janë të përjashtuar nga ndalimi.

Nga ora 6 e mëngjesit deri në orën 15, banorët e këtyre dy qyteteve mund të hyjnë vetëm brenda lagjeve ku ata jetojnë për të blerë ilaçe dhe gjëra të domosdoshme.

Komisioni Europian zgjat ndalimin e udhëtimeve jo të domosdoshme nga vendet e tjera në vendet anëtare të BE deri në mes të muajit maj, për shkak të koronavirusit. KE u ka kërkuar vendeve anëtare të zgjasin ndalimin e udhëtimit deri më 15 maj, njoftoi Brukseli.

“Ne sot po zgjasim kufizimin e udhëtimeve jo thelbësore nga qarqet e treta në BE deri në 15 maj. Është e nevojshme për të vazhduar zvogëlimin e rrezikut të përhapjes së sëmundjes më tej. Ende nuk duhet ta lëmë derën të hapet ndërsa po sigurojmë shtëpinë tonë”, shkroi Komisioneri Europian, Margaritis Schinas në Twitter.

“Përvoja e shteteve anëtare dhe vendeve të tjera të ekspozuara ndaj pandemisë, tregon që masat e marra për të luftuar përhapjen e virusit, për të qenë efektive, duhet të zgjasin më shumë se 30 ditë”, tha Komisioni në një deklaratë.

“Megjithëse ne tashmë mund të shohim rezultatet e para, nevojitet një shtyrje e kufizimeve të udhëtimit për të vazhduar me uljen e përhapjes së sëmundjes. Ne nuk mund ta hapim derën, derisa ta sigurojmë shtëpinë”, tha Schinas.

Kufizimi i udhëtimit, si dhe ftesa për ta zgjatur atë, i referohet zonës së ashtuquajtur “BE plus”, e cila përfshin të gjitha shtetet anëtare të BE-së, anëtarët e Shengenit, si dhe katër vendet – Islandën, Lihtenshtajnin, Norvegjinë dhe Zvicrën.

Komisioni Europian bën thirrje për një qasje të koordinuar, pasi beson se masat mund të jenë efektive, vetëm nëse zbatohen nga të gjitha vendet në të njëjtën periudhë dhe në një mënyrë unike.

Sipas deklaratës së KE-së, çdo zgjatje e mëtejshme e kufizimeve të udhëtimit përtej 15 majit do të vendoset më vonë, dhe do të bazohet në një vlerësim të situatës epidemiologjike.

Presidenti i Shteteve të Bashkuara, Donald Trump, tha se sheh shpresë në luftën kundër koronavirusit.

Duke folur në Shtëpinë e Bardhë, Trump tha se numri i viktimave në SHBA do të arrijë nivele “të tmerrshme” gjatë dy javëve të ardhshme, por shtoi se numri i njerëzve të infektuar është duke “u nivelizuar”.

“Shohim dritë në fund të tunelit”, tha Trump. “Shohim që po ndodhin gjëra të mira”.

Të dielën, Nju Jorku, që është epiqendra e shpërthimit të sëmundjes në SHBA, raportoi rënie të numrit të të infektuarve të rinj dhe të viktimave. Deborah Birx, koordinatore e task-forcës së Shtëpisë së Bardhë për koronavirusin, tha se Spanja dhe Italia janë duke parë shenja pozitivë dhe se pret që edhe SHBA-ja ta ndjekë atë trajektore.

“Spanja dhe Italia na japin shpresë për atë se si mund të jetë e ardhmja jonë”, tha Birx.

Sipas të dhënave të Universitetit Johns Hopkins, koronavirusi ka prekur mbi 1.2 milion njerëz në gjithë botën. Më shumë se një e katërta e tyre janë shëruar plotësisht nga sëmundja, ndërsa më shumë se 69,000 kanë vdekur. Shtetet e Bashkuara kanë numrin më të madh të të infektuarve: mbi 337,000.

Atje kanë vdekur mbi 9,200 njerëz.