Ministri i Shëndetësisë në detyrë, Arben Vitia, shpreson që deri më katër maj të ndalin ciklin e rritjes së numrit të të infektuarve me Covid-19.

Ai gjithashtu ka paralajmëruar një pako për Luginën e Preshevës.

“Njëra nga temat kyçe që kemi biseduar me ministrin e shëndetësisë së Serbisë ka qenë edhe Lugina. Para kësaj, të premten e kaluar bashkë me kryeministrin Kurti dhe ministrin Bislimi kemi biseduar për masat dhe ndihmat që ne si qeveri do t’i dërgojmë në Luginë dhe pas këtyre diskutimeve do të dalin me një pako. Njëra ndër kërkesat tona për ministrin serb ishte ajo për testimin, dhe mënyrën si po trajtohen qytetarët në Luginë”, ka thënë ai. “nga ana e ministrit na është thënë se do të funksionojnë si për qytetarët e tjerë. Në bashkëpunim edhe me komunat atje do të zgjidhet shumë shpejtë”.

Ai thotë se do të ketë përmirësim të situatës, por nëse respektohen masat e Qeverisë.

“Më 4 maj ne shpresojmë se do të ndalim ciklin e rritjes së numrit të të infektuarve. Ne kemi parë disa shtete si model, dhe kemi pasur fat që kemi marrë disa masa në fillim duke i mbyllur shkollat që ka pasur efekt. Kjo na ka ndihmuar shumë që të menaxhohet situata më mirë”, ka thënë Vitia.

Kryetari i Shoqatës Kulturore „Dituria“ Nexhmedin Ademi ka njoftuar se sot po bëhet shpërndarja e miellit në Preshevë, Bujanoc dhe Medvegjë, donacion nga fondacioni „FIRDEVS“ i hoxhë Elvis Naçit në bashkëpunim me Shoqatën Kulturore „Dituria“ raporton rtvpresheva.com

Me Bismil – lah.
Sot filluam me shperndarjen e miellit donacion nga fondacioni „FIRDEVS“ i hoxhë Elvis Naçit në bashkëpunim me Shoqatën Kulturore „Dituria“. Donacioni kap sasinë prej 50 ton miell (pesëdhjet mijë kilogram miell).
Ndihma është kontribut në kuadër të aksionit ndihmë: „Shqiptarët për shqiptarët“.
Në emër të qytetarëve të Luginës faliminderit për solidaritetin e treguar nga fondacioni „FIRDEVS“, në këtë situat të vështirë.
LUGINA NUK HARRON
Distribuimi do të bëhet në Preshevë, Bujanoc dhe Medvegjë.
Faliminderit gjithë aktivistëve për mobilizimin.
Faliminderit firmës Keramike të pronarit Samet Fejzullahut nga fsh. Cortoticë për ndihmën e ofruar.
Faliminderit bashkëpunëtorëve që po na mbështetin në realizimin e këtij aktiviteti madhor.
Së bashku ia dalim…. thuhet në njoftimin e Nexhedin Ademit, kryetar i shoqatës „Dituria“

Ministri i Punëve të jashtme i Shqipërisë, Gent Cakaj ka bërë të ditur se sot ka zhvilluar një numër telefonatash me përfaqësues institucionalë në Kosovë, Maqedoni të Veriut, Mal të Zi e Luginë të Preshevës, për të biseduar për shëndetin e bashkëkombësve tanë, masat e ndërmarra në luftën kundër pandemisë dhe rëndësinë e bashkëpunimit të shtuar në mposhtjen përfundimtare të COVID-19. Ai ka zhvilluar bisedë telefonike me Kryetarin e Këshillit Kombëtar Shqiptar, z. Ragmi Mustafa, si dhe me dy kryetarët e komunave Preshevë dhe Bujanoc, Shqiprim Arifin dhe Shaip Kamberin.

Në njoftimin e z.Gent Cakaj thuhet:

„Sot zhvillova një numër telefonatash me përfaqësues institucionalë në Kosovë, Maqedoni të Veriut, Mal të Zi e Luginë të Preshevës, për të biseduar për shëndetin e bashkëkombësve tanë, masat e ndërmarra në luftën kundër pandemisë dhe rëndësinë e bashkëpunimit të shtuar në mposhtjen përfundimtare të COVID-19.

Bisedova me Ministrin e Jashtëm të Kosovës, z. Glauk Konjufca, zv. Kryeministrin e Maqedonisë së Veriut, z. Bujar Osmani, Kryetarin e Tuzit, z. Nik Gjeloshaj e zv. Kryetarin e Parlamentit të Malit të Zi, z. Genci Nimanbegu dhe, natyrisht, me Kryetarin e Bujanovcit, z. Shaip Kamberi, Kryetarin e Preshevës, z. Shqiprim Arifi dhe Kryetarin e Këshillit Kombëtar Shqiptar, z. Ragmi Mustafa.

Ndonëse në këtë luftë jemi sfiduar të gjithë, së bashku do t’ia dalim pa asnjë diskutim!
Natyrisht, ne do ta ruajmë komunikimin institucional për të bashkërenduar veprimet tona sipas nevojave“.

Në Serbi, vendkalimet Sremska Raca, Preshevë, Gostun dhe Merdare do të veprojnë në këtë regjim

Nga sot, nis zbatimi i sistemit të korridoreve “të gjelbërta” në vendkalime të caktuara kufitare brenda rajonit të CEFTA-s, dhe kur plotësohen kushtet teknike të përcaktuara, në këtë sistem do të përfshihen vendkalimet e tjera.

Vendet e Marrëveshjes së Tregtisë Evropiane Qendrore (CEFTA) kanë miratuar një listë të mallrave duhet të jepen me përparësi kur bëhet fjalë për transport ndërkufitar për të siguruar furnizim adekuat përballë krizës së COVID19.

Këto janë pajisje mjeksore dhe ushqimore që në të ardhmen do të kenë përparësinë e kalimit në të ashtuquajturat. “korridoret e gjelbërta” të vendosura me qëllim të një transporti më efikas dhe kalimit më të shpejtë të kufijve për të gjitha mallrat.

“Korridorët e Gjelbër” do të thotë procedura të përshpejtuara ligjore dhe shëndetësore në vendkalime të caktuara kufitare që do të jenë të hapura për transportin e mallrave 24 orë, shtatë ditë në javë.

Sqarim

Kryetari i Komunës së Bujanocit z. Shaip Kamberi, më 09.04.2020 i ka dhënë një deklaratë gazetës lokale “Bujanovaçke”, në gjuhën serbe, duke sqaruar arsyet e bllokimit të llogarisë së komunës, me ç`rast punëtorët e komunës nuk kanë mundur t`i marrin rrogat për muajin mars 2020.
Ju bëjë me dije se borxhi i shkollës së mesme “Sezai Surroi”, në vlerë totale prej 361078.64 dinarë, është bërë para shpalljes së gjendjes së jashtëzakonshme. Komplet dokumentacioni iu është dorëzuar shërbimit të financave, pas kryerjes së procedurave ligjore. Mirëpo edhe pas 45 ditëve borxhi nuk është paguar nga ana e shërbimit të finacave të komunës, ku në bazë të ligjit në fuqi vie deri te bllokimi i llogarisë së institucionit. Mësimi i rregullt në shkolla është ndërprerë më 15.03.2020 me vendim të qeverisë, për shkak të pandemisë COVID-19. Nxënësit përcjellin mësimin në distancë. Komplet inçizimi i materialit mësimor, për shkolla fillore me mësim në gjuhën shqipe, është përgatitur në shkollën e mesme “Sezai Surroi”
Mendoj se kryetari Kamberi nuk ka informata të sakta dhe nuk ka arsye të akuzojë shkollën e mesme për bllokim të llogarisë së komunës.
Urojmë që sa më parë të debllokohet zhirollogaria e komunës së Bujanocit.

Drejtori i shkollës së mesme
Zejni Fejzullahu