Gjermania tani ka më shumë njerëz të shëruar nga koronavirusi sesa raste aktive, kanë thënë zyrtarët.

Në 24 orët e fundit janë regjistruar 2.537 raste pozitive, duke e rritur në 127.854 numrin total të të prekurve nga sëmundja COVID-19, që shkakton koronavirusi.

Kjo është shifra e katërt më e madhe e të infektuarve në Evropë, mirëpo mbi 50 për qind e tyre janë shëruar.

Në Spanjë 37 për qind e 166.831 personave të infektuar janë shëruar, në Itali 22 për qind e 156.363 të prekurve dhe në Francë 21 për qind e 133.670 personave të sëmurë.

Në Mbretërinë e Bashkuar 85.208 persona kanë rezultuar pozitivë, mirëpo vetëm 0,3 për qind janë shëruar.

Gjermania ka edhe shkallën më të ulët të mortalitetit, e cila i është atribuuar numrit të madh të testimeve, pasi në mesin e të infektuarve ka pacientë me simptoma të lehta.

Kancelarja gjermane Angela Merkel dhe zyrtarë të lartë shtetërorë do të takohen të hënën për të diskutuar mundësitë e lirimit të masave të izolimit.

Disa vende europiane po nisin këtë javë lehtësimin e masave të ashpra të bllokimit kundër përhapjes së koronavirusit. Vendimet janë marrë pas shifrave që treguan rënie të ritmeve të përhapjes në vende problematike si Italia dhe Spanja, por edhe në vende të tjera të unionit si në Austri dhe Danimarkë.

Në Danimarkë, pas disa javësh mbyllje për urgjencën e koronavirusit, kopshtet dhe shkollat fillore do të rihapen.

Rreth 52 bashki, përfshirë Kopenhagën, do t’i rikthehen normalitetit duke dalë nga rregullat e karantinës.

Vendimi për hapjen e shkollave fillore u njoftua në një konferencë për shtyp nga kryeministrja Mette Frederiksen, i cili u konfirmua edhe nga Ministria e Shëndetësisë.

Këtë të hënë Spanja shënoi 517 të vdekur në 24 orët e fundit nga COVID-19, një shifër që vërteton sërish kurbën rënëse të ditëve të fundit, ashtu siç ndodh edhe me infektimet. E teksa duket se situata është nën kontroll, po nga kjo e hënë qeveria ka nisur lehtësimin e masave bllokuese.

Në punë u rikthyen punonjësit e ndërtimit, fabrikave dhe të tjerë që qëndruan në shtëpi gjatë këtyre javëve të vështira, pasi e kishin të pamundur t’a kryenin punën nga shtëpitë.

Masat e sigurisë kundër koronavirusit në këto vende janë megjithatë jashtëzakonisht strikte. Në metrotë dhe stacionet e autobusëve në Madrid, policët shpërndajnë maska për udhëtarët, që megjithatë janë shumë herë më të paktë se në ditët normale.

Lehtësimi i masave do të nisë të martën edhe në Itali, ku gradualisht do të rihapen fabrikat, mes të cilave ato ushqimore, bujqësia, peshkimi, zdrukthëtaria, nxjerrja e naftës, studiot ligjore, ato shkencore etj.

Banorët në shtetin verior të Indisë Punjab këto ditë po e shohin  vargmalin e Himalajeve, i cili tani është më i dukshëm nga 160 kilometra për shkak të zvogëlimit të ndotjes së ajrit të shkaktuar nga bllokada si pasojë e koronavirusit në vend.

Indianët në qytetin e Jalandharit dhe zonën përreth kanë postuar fotografi në internet me pamje nga shtëpitë e tyre, me disa duke thënë se nuk kanë parë majat e Himalajeve për dekada.

“Për herë të parë në gati 30 vjet (Unë) mund të shoh qartë Himalajet për shkak se bllokada në Indi ka pastruar ajrin. Mahnitëse,” shkroi Manjit Kang një qytetar i kësaj zone.

Fenomeni është bërë i mundur nga një përmirësim dramatik në cilësinë e ajrit javët e fundit, pasi industritë u mbyllën, makinat u larguan nga rruga dhe linjat ajrore anuluan fluturimet në përgjigje të pandemisë së koronavirusit.

Delhi regjistroi një ulje prej 44% të niveleve të ndotjes së ajrit PM10 në ditën e parë të kufizimeve të tij, theksohet në të gjeturat e Bordit Qendror të Kontrollit të Ndotjes së Indisë.

Sipas raportit, në total 85 qytete në të gjithë Indinë panë më pak ndotje të ajrit në javën e parë të bllokimit mbarëkombëtar.

Ndërkohë, cilësia e ajrit në Jalandhar, e cila ndodhet më shumë se 160 kilometra larg  Himalajeve, është matur si “e mirë” në indeksin kombëtar të vendit për 16 nga 17 ditët që kur u njoftua bllokimi në shkallë vendi, raporton CNN, transmeton Klan Kosova.

Në të kundërtën, e njëjta periudhë 17 ditore vitin e kaluar nuk arriti të regjistrojë një ditë të vetme të cilësisë së “mirë” të ajrit – dhe në 17 ditët e para të marsit të këtij viti, vetëm tre ditë panë cilësi “të mirë” të ajrit.

India është shtëpia e 21-të nga 30 zonat urbane më të ndotura në botë, sipas të dhënave të përpiluara në Raportin e Cilësisë së Ajrit Botëror të IQAir AirVisual për vitin 2019, me gjashtë në top dhjetëshen.

Vendi ka raportuar gati 6,000 raste nga Covid-19, dhe 178 vdekje sipas shifrave të Universitetit Johns Hopkins, transmeton Klan Kosova.

Në fillim të muajit Arabia Saudite vendosi ndalimin tërëditor të lëvizjes në Mekë dhe në Medinë, në kuadër të masave për parandalimin e përhapjes së koronavirusit, raporton “Anadolu Agency” (AA).

Vendet e shenjta të muslimanëve, ku gjatë të gjitha periudhave të vitit janë të pranishëm një numër i madh besimtarësh, këto ditë janë plotësisht të boshatisura.

AA-ja ka arritur të bëjë foto të Mesxhidul-haramit, e njohur si Xhamia e Shenjtë ose Xhamia e Madhe në Mekë, e cila parqet qendrën e botës muslimane dhe vendi kah drejtohen muslimanët pesë herë në ditë kur falen.

Hapësira e Qabesë, që është vendtubimi i besimtarëve nga e gjithë bota, posaçërisht gjatë haxhit, një nga pesë shtyllat e islamit, është plotësisht e zbrazur. Përreth Qabesë mund të shihen vetëm personat që sigurojnë dhe mirëmbajnë këtë hapësirë.

Në foto, mund të shihet edhe hapësira e cila në kushte normale përdoret nga haxhinjtë gjatë kryerjes së sa’jës (ecja nga Safa deri në Merve), e cila gjithashtu është plotësisht e zbrazur.

Sipas vendimit të Ministrisë së Brendshme saudite, të 2 prillit, në Mekë dhe Medinë u shpall orë policore deri në njoftimin e mëtejshëm. Punonjësit në sektorin publik dhe privat, të cilat janë jetësore, janë të përjashtuar nga ndalimi.

Nga ora 6 e mëngjesit deri në orën 15, banorët e këtyre dy qyteteve mund të hyjnë vetëm brenda lagjeve ku ata jetojnë për të blerë ilaçe dhe gjëra të domosdoshme.