Taksa e vendosur ndaj Serbisë, ka shkaktuar plasaritje të madhe brenda koalicionit qeverisës dhe kjo po vërehet çdo ditë në deklaratat e zyrtarëve të PDK-së dhe AAK-së. Por, pavarësisht kësaj, analistët nuk po i shohin zgjedhjet si opsion.

Madje, edhe LDK-ja, e cili në vazhdimësi ka kërkuar zgjedhje, së fundi ka thënë se është e nevojshme një qeveri gjithëpërfshirëse, e cila krahas përmbylljes së procesit të dialogut, do ta përgatiste vendin për zgjedhje të reja.

Këtë ofertë të LDK-së, analisti Imer Mushkolaj e sheh si joserioze.

“Është më shumë për t’u treguar ndërkombëtare, respektivisht për ta përballur presionin që i bëhet se ja e kemi një opsion për të dalë nga kriza, por realisht nuk është opsioni i mundshëm, duke pasur parasysh qëndrimin e njohur të Vetëvendosjes, e cila në bazë të qëndrimit të deritashëm, nuk besoj se do të jetë pjesë e një qeverie gjithëpërfshirëse”, tha Mushkolaj për Radio Kosovën.

Por, a janë zgjedhjet zgjidhje? Mushkolaj thotë se pavarësisht situatës brenda koalicionit qeveritar, asnjërit prej partnerëve nuk iu konvenojnë zgjedhjet, për vetë faktin se taksa si shkaktar, është një element populist.

Edhe analisti tjetër, Blerim Burjani, nuk sheh zgjedhje të reja në këtë moment të dialogut me Serbinë, e po ashtu duke pasur parasysh edhe mosfunksionalizimin e KQZ-së, që, sipas tij, presidenti po e mban peng.

Ai thotë se mund të formohet një qeveri kalimtare pa AAK-në, Vetëvendosjen dhe PSD-në.

“Unë nuk pres zgjedhje të jashtëzakonshme, por vetëm riformulim të Qeverisë. LDK-ja tashmë ka dhënë sinjalet e para se është e interesuar të jetë pjesë e qeverisjes së re dhe me një marrëveshje të re, LDK, PDK dhe Nisma. Këta mund ta formojnë një qeveri kalimtare”, tha Burjani.

Zgjedhje apo riformulim i Qeverisë, kjo mbetet të shihet, por përplasjet brenda partnerëve të koalicionit tashmë kanë dalë haptazi. Përderisa kryeministri Haradinaj dhe zyrtarët e tjerë të AAK-së janë këmbëngulës që taksa ndaj Serbisë të mos hiqet, zyrtarë të PDK-së, ministra e zëvendësministra kërkojnë reflektim nga shefi i tyre në Qeveri.

Sidoqoftë, sipas analistit Imer Mushkolaj, zgjedhje mund të ketë, vetëm nëse SHBA-ja është e interesuar për një gjë të tillë dhe nëse Haradinaj shihet vërtet si pengesë në planet e SHBA-së për ta çuar përpara dialogun me Serbinë.

Kryetari i Kuvendit të Maqedonisë, Talat Xhaferi konsideron që Kosova nuk duhet të lejojë të stërgjatët procesi që e dërgon vendin në një marrëveshje finale me Serbinë.

Sipas tij, duhet të gjendet një zgjidhje e pranueshme për popullin e Kosovës.

Pasi Maqedonia arriti të zgjidh konfliktin 30 vjeçar mbi emrin, që e kishte me Greqinë, vendit iu hapën dyert për anëtarësim në NATO.

Kryetari i Kuvendit të Maqedonisë, Talat Xhaferi thotë për KosovaPress, se bëjnë përpjeke që edhe Kosova të jetë prezentë në organizatat ndërkombëtare.

Duke iu referuar përvojës së Maqedonisë, në konfliktet që kanë të bëjnë më fqinjët, Xhaferi sugjeron që të shfrytëzohen përvojat e tyre dhe Kosova mos të lejojë të stërgjatët procesi me Serbinë.

“Si vend fqinj normal që bëjmë përpjekjet që Kosova të jetë prezent në të gjitha organizmat dhe veprimet ndërkombëtare që ndodhin, dhe për këtë arsye mendoj që u takon institucioneve të Kosovës dhe popullit të Kosovës, që edhe duke iu referuar përvojës tonë tre dekadëshe për çështje që kanë të bëjnë me marrëdhëniet me fqinje. Nuk do mend që sugjerimi është që ato përvoja të shfrytëzohen dhe mos të lejojnë që proceset të stërgjatën me dekada, por të gjendet zgjidhje që do të jetë e pranueshme për popullin e Kosovës, për institucionet e Kosovës dhe normal për të dy palët për faktin që çështja ka të bëjë me raportet dy palëshe dhe në këtë aspekt… Këto janë çështje për të cilat kurdo duhet të ketë një vendim, marrëveshje, konform asaj çka janë pritshmëritë e qytetarëve”, thotë ai.

Në Kosovë po flitet se një marrëveshje finale me Serbinë do të mund të ndodh brenda këtij viti.

Megjithatë, dialogu aktualisht ka ngecur, meqë pala serbe nuk po i përgjigjet tavolinës në Bruksel pas taksës 100%, që Qeveria e Kosovës i ka vënë produkteve që vijnë nga Serbia, si përgjigje ndaj fushatës së egër të shtetit fqinj në politikën e jashtme të Kosovës.

Ndërkohë në Maqedoni është shënuar historia duke u mbyllur konflikti 30 vjeçar që e kishin me Greqinë mbi emrin.

Si rrjedhojë e kësaj, më 6 shkurt të këtij viti vendet anëtare të NATO-s kanë nënshkruar protokollin e anëtarësimit të Maqedonisë së Veriut në aleancën më të madhe ushtarake.

E kjo erdhi pasi Kuvendi i Maqedonisë miratoi me 81 vota pro ndryshimet kushtetuese duke zyrtarizuar emrin e ri të shtetit- Republika e Maqedonisë së Veriut.

Situata politike në Shqipëri ka ngjallur mjaft interes në shtetin fqinj, Italinë. Gazetarë të mediave të rëndësishme italiane kanë qenë në vendin tonë, pas protestave dhe djegies së mandateve të deputetëve të opozitës së bashkuar, ku kanë marrë në intervistë kryeministrin Edi Rama dhe liderët e opozitës. 

Në një intervistë për ‘la Republica”, kreu i qeverisë shqiptare thekson sërish se djegia e mandateve nuk është ide e mire, por thotë se teknikisht parlamenti mund të ecë përpara pa probleme. Thotë se në protestë nuk është populli por administrata e PD-së, dhe se e gjitha është 100 % luftë për pushtet. Gjithçka “dirigjohet” nga Berisha – thotë Rama – i cili është “shefi” – siç ai shprehet ndërsa Basha, administratori i deleguar.

Pyetet edhe për deklaratat e forta të ish-kryeministrit Sali Berisha se njerëzit do ta hedhin në lumë dhe se e vetmja mënyrë ta ta eliminuar është një plumb. Por Rama përgjigjet duke risjellë në memorien e tij deklarata edhe më të forta. “Ka thënë edhe më keq se kjo. Është penduar që nuk më vrau kur ishte në qeveri, ai kështu është dhe unë nuk i përgjigjem”.
Intervista e Kryeministrit për “La Republica”

Edi Rama, kryeministër i Shqipërisë prej vitit 2013, a ndiheni i rrethuar?

S’bëhet fjalë. Kjo nuk është një protestë e popullit. Nuk janë as jelekëverdhë, as sindikalistë, as studentë. Nuk janë as anarkistë! Është vetëm një pjesë e politikes që ka zbritur në shesh, pak për pushtet e pak nga frika.

Frikë nga çfarë?

Frikë se mos shfarosen definitivisht. Është një e djathtë e vjetër, që u dërgua në shtëpi 5 vjet e gjysmë më parë nga votat e shqiptarëve. Tashmë i druhen reformës në drejtëësi që po bëjmë me Bashkimin Europian për të luftuar korrupsionin, kancerin e vërtete të këtij vendi. Prokurorë, gjyqtarë dhe funksionarë të tjerë të korruptuar do ikin të gjithë! Këtë kanë frikë ata.

Në shesh kërkojnë dorëheqjen tuaj. Dhjetëra-mijëra persona. Ju thoni se as nuk e mendoni dorëheqjen. A jeni i sigurt se do t’ja dilni të ecni përpara?

Imagjinoni sikur të ndodhte në Itali, kjo që po ndodh tek ne, deputetët e opozitës dorëzojnë mandatet dhe braktisin parlamentin. Pastaj i kërkojnë qeverisë së zgjedhur nga populli që të largohet. Kjo nuk është demokraci, është tirani e minorancës. Ne kemi marrë një detyrë nga populli dhe do ta respektojmë.

Më falni por është një situatë anormale, sidomos për një kryeministër socialist e progresist, një parlament pa opozite?

Për demokracine parlamentare sigurisht nuk është gjë e mirë, por teknikisht mund të ecim përpara, nuk ka asnjë problem.
Kush dhe cfarë qëndron pas protesave dhe sulmeve kundër jush. Në shesh ishin shumë të papunë, njerëz të varfër.
Të gjitha bashkitë e administruara nga të djathtet, të enjten ishin mbyllur. Liderët e opozitës i sollën në protestë të bënin figurantët poshtë parlamentit. Janë 3-4 mijë persona që varen nga të djathtet. Paguhen për të ardhur në protestë.  Por unë jam nga ata që kanë patur gjithmonë respekt për protestat, i dëgjoj të gjithë. 

Për shumë njerëz, ky kaos duket si luftë për pushtet. A është kështu?

100% po

A është e vërtetë që sheshi manovrohet nga armiku juaj historik Berisha?

Armiqte e mi historikë janë injoranca dhe vulgariteti. Dy gjëra që nuk i duroj dot. Berisha është gjithmonë aty, ai është shefi dhe Basha është administratori i deleguar.

Pyetja: Ish-presidenti Berisha ka përdorur fjalë shumë të rënda kundër jush: thotë se njerëzit do ta hedhin në lum, dhe se e vetmja mënyrë për t’ju eleminuar është një plumb.
 Ka thënë edhe më keq se kjo. Është penduar që nuk më vrau kur ishte në qeveri, ai kështu është dhe unë nuk i përgjigjem. Më kujtohet që thoshte se më keq se komunistët janë anti-komunistët. Ja, Berisha i ka shërbyer në fillim komunizmit dhe pastaj u bë anti-komunist. Për fat të mirë ne nuk jemi më në epokën e plumbit, por të fjalës, të dialogut. Unë refuzoj logjikën e fushës së lojës ku duhet domosdoshmërisht të asgjësohet kundërshtari
Lexo më shumë në: https://www.gazetaexpress.com/lajme-nga-shqiperia/rama-per-la-republica-berisha-eshte-penduar-qe-nuk-me-vrau-kur-ishte-ne-qeveri-629573/?utm_source=referral&utm_medium=web&utm_campaign=copyright